Planea bo negoshi
Scirbi bo Plan di Negoshi
Bo plan di negoshi ta e fundeshi di bo negoshi. Siña con pa scirbi un plan di negoshi lihe y efectivo uzando un ehempel di un plan di negoshi.
Contenido
- Un plan di negoshi ta yuda bo maneha bo negoshi
- Scoge un structura di un ‘plan di negoshi’ cu lo traha miho pa bo
Un plan di negoshi ta yuda bo maneha bo negoshi
For di ora bo start un negoshi, un bon plan di negoshi (‘business plan’) lo guia bo con pa maneha bo negoshi. Bo lo uza bo plan di negoshi manera un mapa pa structura, maneha y amplia bo negoshi. Esaki ta e manera pa pensa y ta e yabi di bo negoshi.
Cu bo plan di negoshi bo por logra haya financiamento of haya partnernan nobo si acaso bo ta desea esaki.
Inversionistanan kier sinti nan mes confia cu nan por haya algo bek di nan inversion. Cu bo plan di negoshi bo por convence hende cu ta traha cu bo- of cu ta inverti den bo negoshi cu nan escogencia ta uno sabi.
Scoge un structura di un ‘plan di negoshi’ cu lo traha miho pa bo
No ta existi un bon of mal forma pa scirbi un plan di negoshi. Loke ta importante ta, cu bo plan ta satisface bo necesidadnan.
Mayoria plan di negoshi ta cay bao dos categoria: tradicional of ‘lean startup’.
Tradicional: E plan aki ta wordo mas uza: ta uza un structura standard, y ta motiva bo bay mas profundo den cada seccion. E ta tuma mas tempo y por termina cu hopi pagina. E plan aki pues ta hopi detaya, ta tuma hopi tempo y hopi mas amplio. Personanan cu ta fia placa of inversionistanan mas tanto lo pidi e tipo di plan di negoshi aki.
Lean startup/ Business Model Canvas: E plan aki ta menos comun, pero ta uza un structura standard. E ta enfoca mas riba un resumen di e puntonan di mas importante di bo plan. Esaki por costa bo solamente un ora pa scirbi y por ta solamente un pagina. E enfoke di e plan aki ta di un nivel halto, cu ta wordo scirbi lihe y ta contene solamente elementonan clave. Personanan cu lo kier fia bo placa of inversionistanan hopi biaha lo kier haya mas informacion.
Structura di un ‘plan di negoshi’ tradicional
Bo lo prefera un structura di un ‘plan di negoshi’ tradicional si acaso bo kier ta mas detaya, bo kier un plan mas amplio of tin pensa di busca financiamento di fuentenan tradicional.
Ora bo ta scirbi un ‘plan di negoshi’ bo no mester tene bo mes exactamente na e structura di e plan di negoshi. En bes di esaki uza e seccion cu tin mas sentido pa bo negoshi y bo necesidadnan.
‘Plan di Negoshi’ tradicional ta uza un combinacion di e siguiente nuebe (9) seccionnan:
- Resumen ehecutivo Conta brevemente tocante bo compania y pakico e lo ta exitoso. Inclui bo mision, bo producto of servicio y informacion basico di bo compania su team di liderazgo, empleado y localidad. Tambe bo mester inclui informacion financiero y plan di crecemento riba un nivel halto si acaso bo ta planeando pa solicita pa financiamento.
- Descripcion di compania Uza bo descripcion di bo compania pa duna informacion detaya tocante bo compania. Detaya e problemanan cu bo compania a resolve. Sea specifico y anota bo consumidornan, organisacion of negoshinan cu bo compania ta bay sirbi. Splica e bentahanan competitivo cu lo haci bo negoshi exitoso. Tin experto den bo team? Bo a logra di haya e localidad perfecto pa bo tienda? E descripcion aki di bo compania lo bisa algo di bo puntonan fuerte.
- Analisis di mercado Bo lo mester tin un bon comprondemento di e perspectivanan di bo industria y grupo obhetivo (target group). Investigacion competitivo lo mustra bo kico otro negoshinan ta haciendo y cua ta nan puntonan fuerte. Den bo investigacion di mercado, wak pa tendencianan y temanan. Kico competidornan exitoso ta haci? Pakico e ta traha? Bo por haci miho? Awo ta e ora pa contesta e preguntanan aki.
- Organisacion y maneho Bisa bo lesadornan con bo compania lo ta structura y ken lo manehele. Describi e forma legal di bo negoshi.Uza un ‘organogram’ pa establece kende ta encarga cu cual responsabilidad den bo negoshi. Mustra nan con nan experiencia unico lo contribui den e exito di bo negoshi. Considera pa inclui CV di bo empleadonan.
- Servicio of liña di producto Describi kico bo ta bende of ki servicio bo ta ofrece. Splica con e ta beneficia bo clientenan y con duradero e producto ta. Comparti bo plan pa propiedad intelectual, manera ‘copyright’ of ‘patent’. Si acaso bo ta haci Research & Development pa bo servicio of producto, splica esaki den detayes.
- Marketing y benta No tin un solo manera pa acerca un strategia di marketing. Bo strategia mester evoluciona y cambia pa por adapta su mes na bo necesidadnan unico.Bo meta den e seccion aki ta pa describi con bo lo atrae y retene cliente. Tambe bo mester describi con bo benta lo sosode. Bo tin cu referi na e seccion aki mas laat ora bo haci proyeccionnan financiero, pues ta sigur cu bo ta describi bo marketing y strategia di benta completo.
- Peticion pa fondonan Si bo kier pidi pa financiamento, akinan bo tin cu describi e rekisitonan di bo financiamento. Bo meta ta pa clarifica cuanto fondo bo lo tin mester pa e proximo cinco añanan y pakico bo lo usele.Specifica si bo lo desea debe of capital, e condicionan pakico bo ta solicitando y den cuanto tempo esaki lo wordo uza. Duna un descripcion detaya di con bo lo bay uza bo financiamento. Specifica si bo lo bay tin mester di fondo pa cumpra ekipo di material, paga salario of paga recibonan specifico te ora cu bo ganashi cuminsa subi. Semper añadi un descripcion di bo plannan financiero strategico den futuro, manera debenan cu bo lo bay paga.
- Proyeccionnan financiero Complementa bo peticion di financiamento cu un proyeccion financiero. Bo meta ta pa convence e lesadornan cu bo negoshi lo ta financiamento exitoso.Si bo negoshi ya ta estableci, inclui un specificacion di bo operacion (entradanan menos e gastonan), balansa y fluho di fondo di e ultimo tres pa cinco añanan. Si acaso bo tin un otro garantia cu bo lo kier uza pa un finansa corda inclui esaki tambe.Añadi un plan financiero cu bo ta premira pa e proximo cinco añanan. Inclui hunto cu esaki un specificacion di bo entradanan menos e gastonan, un specificacion di e balansa, un specificacion di fluho di fondo, y presupuesto pa gastonan di inversion. Ta un poco mas specifico pa e prome aña y uza proyeccionnan pa kwartaal of hasta cada luna. Splica claramente bo proyeccionnan y relacionanan hunto cu bo peticion di financiamento.Por uza grafico y diagram pa conta e historia financiero di bo negoshi.
- Anexo Uza bo anexo pa manda documentonan necesario of otro materialnan cu ta wordo pidi. Documentonan cu sa wordo hopi inclui como anexo ta: historia di credito, CV di bo empleadonan, imagen di producto, carta di referencia, permisonan, documentonan legal, y otro contractonan.
Prome cu bo scirbi bo plan di negoshi, lo ta bon pa sondia algun plan di negoshi como ehempel pa scirbi bo mes un plan real di negoshi.
E structura di un ‘Lean startup’ ta grafico cu ta uza solamente elementonan pa describi e proposicion di balor, infrastructura, clientenan y finansas di bo negoshi. Nan ta util pa visualisa compensacionnan y factornan fundamental di bo negoshi.
Tin hopi ehempel di un ‘Lean startup template’, pero un di esunnan mas bieuw y conoci ta e ‘Business Model Canvas’, cu a wordo desaroya door di Alex Osterwalder. Bo por busca online pa haya esakinan gratis, of otro versionan, pa traha bo plan di negoshi.
Siguientemente e nuebe componentenan di e version di ‘Business Model Canvas’/ Lean Startup
- Partnernan clave Nota akinan e otro negoshinan of servicionan cu bo lo por traha cune pa opera bo negoshi. Pensa riba proveedornan, fabricantenan, contratistanan y otro partnernan cu ta strategico similar.
- Actividadnan clave Traha un lista di e maneranan cu bo negoshi lo logra bentaha competitivo. Menciona cosnan manera benta directamente na cliente, of uzo di tecnologia pa probecha di economia comparativo.
- Recursonan clave Menciona un lista di tur recursonan cu bo lo uza pa agrega balor pa bo clientenan. Bo pertenencia di mas importante por ta bo empleadonan, capital of bo propiedad intelectual.
- Proposicion di balor Traha un declaracion cla y cu ta convence tocante e balornan unico cu bo negoshi ta aporta den e mercado.
- Relacion cu cliente Describi e interaccion di e clientenan den bo negoshi. E lo ta automatisa of personal? Fisico of online? Pensa tocante e cliente su experiencia di principio te final.
- Segmento di cliente Sea specifico ora bo nombra e grupo riba kende bo ta enfoca. Bo negoshi lo no ta pa tur hende, pesey ta importante pa bo tin un bista ken bo negoshi lo sirbi.
- ComunicacionTraha un lista di e maneranan di mas importante cu bo lo papia cu bo clientenan. Mayoria di negoshinan ta uza un mix di medionan di comunicacion y optimalisa esakinan despues di tempo.
- Structura di costo Bo negoshi lo enfoca riba reduccion di costo of maximalisacion di su balor? Defini bo strategia, despues menciona e costo cu mas bo ta enfrentando.
- Fluho di entrada Splica con bo negoshi lo gana placa. Algun ehempel ta benta directo, tarifa di miembrecia, y bende propaganda. Si acaso bo negoshi tin mas fluho di entrada, menciona nan tambe.
Prome cu bo scirbi bo plan di negoshi, lo ta bon pa sondia algun plan di negoshi como ehempel pa scirbi bo mes un plan real di negoshi.
