Haci un impacto den bo comunidad

Tin biaha bo ta wak como entrepreneur solucionnan cu por yuda bo comunidad, sea cu enfoke riba gruponan menos afortuna of cu enfoke riba e proteccion di nos flora y fauna. Tin solucionnan cu un entrepreneur por comercialisa, pues por uza pa yuda nos comunidad y por gana placa cune.

Contenido


Responsabilidad Social Empresarial

Un compania por incorpora diferente iniciativa pa haci un impacto den su comunidad;

  1. Donacion general;
  2. Organisa actividadnan di boluntario pa e empleadonan di e compania;
  3. Uza productonan produci eticamente;
  4. Financia un campaña di promocion relaciona cu un bon causa;
  5. Donacion na un instancia caritativo a base di productonan bendi;
  6. Financia un campaña di cambio di comportacion.

Empresario Social (Social Entrepreneurship)

Con mi por bira un empresario social?

  1. Uza innovacion pa mi responde na necesidadnan social door di uza mi recurso financiero y/of otro tipo di recurso di mi modelo comercial, sin ningun ganashi (break-even).
  2. Uza ganashi di algun di mi actividadnan comercial pa sostene operacionan cu tin un proposito social of comunitario.
  3. Diseña un compania cu cual bo ta genera cambio social y gana placa cune.

Tur cos cu bo mester sa tocante Metanan Mundial pa Desaroyo Sostenibel (SDGs)

E Metanan Mundial pa Desaroyo Sostenibel/Sustainable Development Goals (SDGs) a wordo adopta na September 2015 door di 193 pais, incluyendo Reino Hulandes, durante un evento historico di Nacionnan Uni (United Nations).

Aruba como parti di Reino Hulandes tambe a compromete su mes na e SDGs mirando cu e SDGs ta cuadra cu Aruba su vision y maneho. Conscientisacion pa desaroyo sostenibel ta un paso importante pa implemente e SDGs na Aruba hunto cu e maneho di gobierno.

Aruba desde januari 2017 tin un Comision Nacional di SDGs cu representantenan di diferente ministerio y departamento como miembro. E Comision Nacional di SDGs tin como meta pa duna informacion di e SDGs na Aruba na comunidad, incluyendo na sector priva y na empresanan. Empresanan por contribui na e metanan aki door di por ehempel bira un empresario social cu ta tene cuenta cu e parti comercial di e negoshi pero tambe cu e SDGs.

E Sustainable Development Goals (SDGs), ta consisti di 17 meta y 169 obhetivo. Pa por implementa e SDGs na Aruba a identifica y a propone diferente programanan. E Comision Nacional di SDGs lo coordina e proceso di implementacion y lo monitor e SDGs. Lo raporta na Reino Hulandes y na Nacionnan Uni na cierto momento, tocante e SDGs, e obhetivonan y e indicadornan adapta na necesidadnan local. Por lesa mas tocante e metanan aki bao.

Descripcion di e metanan di SDG

Meta 1 Caba cu pobresa den tur su forma na tur caminda;

Meta 2 Caba cu hamber, logra siguridad di alimentacion y mehora nutricion pa tur hende y promove agricultura sostenibel;

Meta 3 Sigura bida saludabel y promove bienestar pa tur hende di tur edad;

Meta 4 Sigura enseñansa di calidad cu ta inclusivo y rasonabel y cu ta promove oportunidad di siñamento pa bida largo pa un y tur;

Meta 5 Logra igualdad di genero y duna e ser femenino mas autonomia den bida;

Meta 6 Sigura disponibilidad y maneho sostenibel di a awa limpi y bon higiena pa un y tur;

Meta 7 Sigura acceso na energia na un bon prijs, confiabel, sostenibel y moderno pa un y tur;

Meta 8 Promove crecemento economico cu ta sostene, cu ta inclusivo y sostenibel, empleo completo y productivo y trabou decente pa un y tur;

Meta 9 Construi infrastructura fuerte, promove industrialisacion inclusivo y sostenibel y fomenta innovacion;

Meta 10 Reduci desigualdad den y entre paisnan;

Meta 11 Haci cuidadnan y lugarnan unda humanonan ta biba inclusivo, sigur, fuerte y sostenibel;

Meta 12 Sigura modelonan di consumo y produccion sostenibel;

Meta 13 Tuma accion urgente pa combati cambio di clima y su impactonan

Meta 14 Conserva y uzo sosteni di ocean, lama y recursonan marino pa desaroyo Sostenibel;

Meta 15 Proteha, restaura y promove uzo sostenibel di e tera eco-sistemanan di tera, maneho sostenibel di mondinan, combati e degradacion di tera y detene y hala bek y detene perdida di biodiversidad;

Meta 16 Promove sociedadnan pacifico y inclusivo pa desaroyo sostenibel, provee acceso na husticia pa tur y crea institucionnan efectivo, responsabel y inclusivo na tur nivel;

Meta 17 Fortalece e forma di implementacion y revitalisa partnership mundial pa desaroyo sostenibel.

 

SDG Aruba


Pa mas informacion:
L.G. Smith Boulevard 76
Oranjestad, Aruba
Email: [email protected]
Website: sdgaruba.com

Scroll To Top