Bek pa tur topico
Lansa bo negoshi
Scoge e structura di bo negoshi
E escogencia di e structura di bo negoshi ta influencia e operacion diario di bo negoshi, pa impuesto, cuanto personal bo kier tin, etc. Ta hopi importante pa scoge e structura cu ta duna bo e mihor balansa di proteccion y beneficio.
Contenido
Compara tipo di negoshi
Compara tipo di negoshi – Documento den PDF
Revisa e structuranan di negoshi mas comun
Negoshi propio (Eenmanszaak):
- Persona no huridico: ta un persona cu ta pertenece na un persona natural;
- Mag di emplea hende;
- Ta obliga pa registra den e registro comercial na Camara di Comercio;
- Derecho di un nomber comercial;
- No tin distincion entre bienes di negoshi y bienes priva; bo ta responsabel pa bo debenan di bo negoshi;
- Den caso di matrimonio: ambos pertenencia ta cay bou di failliet (e solucion ta pa laga traha un contrato di matrimonio na notario);
- Ganashi di e negoshi ta e entrada di e negoshi (no tin distincion entre bienes (vermogen) di negoshi y bienes priva;
- Impuesto (belasting): ‘inkomstenbelasting’, tarifa progresivo. BBO/BAVP 3% & BAZV 3% ta bin ariba e benta pa luna;
- Capital: no tin, nada mas cu capital personal.
Sociedad Colectivo (Vennootschap Onder Firma – VOF)
- Persona no huridico: ta un sociedad pa realisa un negoshi cu un nomber comun;
- Colaboracion entre 2 of mas persona (personanan natural of huridico) cu ta cera un convenio di colaboracion;
- En principio no ta posibel pa por drenta y sali (cancelacion di un of mas socio kiermen cu e VOF a termina);
- Ora bo ta eherce un actividad profesional como bo ofishi/beroep (por ehempel carpinte of tin un tienda);
- Responsabilidad di participantenan: tur socio ta responsabel pa debenan cu e VOF a haci, maske cu ta un otro socio a haci esaki.
- Forma di establecimento ta bay por escrito (no notarial);
- Supervision gubernamental no ta aplicabel;
- No tin verificacion di antecedente;
- Ta obliga pa registra den e registro comercial na Camara di Comercio;
- Impuesto: cada socio ta un negociante riba su mes y ta paga su mes un BBO/BAVP & BAZV total (6%).
- Cada socio ta responsabel pa su mes un debenan y loonbelasting;
- Capital: no tin capital minimo; capital di empresa ta forma door di aportacion di cada un di e socionan.
Sociedad Anonimo (Naamloze Vennootschap – NV)
- Persona huridico: ta un negoshi cu capital social, na unda cada un di e socionan por participa cu un of mas accion;
- E empresa tin capital dividi den accion. E accionnan ta registra riba nomber;
- Responsabilidad: e accionistanan no ta personalmente responsabel. Desde e momento di publicacion di e constitucion, e directornan respondiente ta keda personalmente responsabel pa e obligacionan cometi durante e constitucion;
- Tramite formativo:
- Acta escrito notarial;
- Verificacion di antecedente.
- Ta obliga pa registra den e registro comercial na Camara di Comercio;
- Impuesto: impuesto riba ganashi ta 25% y BBO/BAVP & BAZV total (6%) di e benta pa luna;
- 3 organo di un NV:
- Den e reunion general pa e accionistanan ta autorisa pa haci cambio den e statuutnan of pa disolve e compania;
- E director ta maneha tur cuenta di e NV, cu e maneho di su actividadnan y di su representante paden y pafo di tribunal;
- E college of e consehero di supervision ta duna conseho of ta guia e director.
- Un NV por opera un of mas negoshi;
- Un director por ta un persona huridico of un persona natural.
Sociedad cu Responsabilidad Limita (VBA)
- Persona huridico: empresa cu responsabilidad limita;
- E empresa tin capital dividi den accion. E accionnan ta registra riba nomber;
- Ta regla door di: ley, statuutnan y reglamento;
- Responsabilidad: e accionistanan of directornan di e compania no ta personalmente responsabel y no ta obliga pa contribui na e debenan di e empresa, solamente si e ley ta prescribi lo contrario;
- E VBA ta ofrece e opcion pa responsabilisa personalmente e accionistanan. Esaki mester ta para den e statuutnan. Esaki por te un cierto suma, cierto debenan, cierto accionistanan. Si ta responsabel personalmente por compara esaki cu VOF;
- Tramite formativo:
- 1 of mas persona cu ta participa;
- Acta notarial/ tin statuut cu nomber, asiento y cu tin un meta;
- Verificacion di antecedente.
- E director mester ta local, si acaso e director no ta local, mester tin representante legal;
- Capital: no tin un minimo (pero por lo menos Afl. 0,01);
- Structura basico: e director mester ta biba na Aruba.
- Ta obliga pa registra den e registro comercial na Camara di Comercio;
- Impuesto: impuesto riba ganashi ta 25% y BBO/BAVP & BAZV ta total (6%) di e benta pa luna.
Maatschap
- Persona no huridico: ta un acuerdo (overeenkomst) entre 2 of mas persona cu ta trece algo hunto cu nan tur ta benificia di dje;
- En principio no ta posibel pa por drenta y sali (cancelacion di un of mas socio kiermen cu e Maatschap a termina);
- Forma di incorporacion (oprichting) no ta notarial;
- Basa riba un ofishi (beroep) (por ehempel tandarts, artsen, advocaat)
- Supervision gubernamental no ta aplicabel;
- No tin verificacion di antecedente;
- Ta obliga pa registra den e registro comercial na Camara di Comercio;
- Mag di tin empleado;
- Responsabilidad di e participantenan: cada un pa su propio accion;
- Cada maat ta trece su contribucion manera trabao, placa y bienes;
- Impuesto: pa inkomstenbelasting e maat ta responsabel; pa BBO/BAVP & BAZV total (6%);
- Cada maat/ socio tin cu paga su mes un loonbelasting.
- Cada maat ta responsabel pa su mes un debenan;
- Den partimento di contribucion di ganashi y perdida, e socionan ta tene na cuenta e contribucion di cada socio;
- Capital: no tin capital minimo; capital di empresa ta forma door di contribucion di cada un di e socionan.
Asociacion cooperativa (Coöperatieve Vereniging)
- Persona huridico;
- Ta un asociacion di personanan, caminda ta permiti entrada y salida di miembronan y cu tin como obhetivo pa promove interes material di e miembronan;
- Responsabilidad: e miembronan di e asociacion ta e doñonan responsabel, mescos cu e accionistanan di un NV/VBA. E responsabilidad di e miembro nan ta regla den e statuut;
- W.A. (Wettelijk Aansprakelijkheid) Responsabilidad Legal: cada miembro ta responsabel pa un parti proporcional di e debenan total di e asociacion. Esunnan cu a termina nan miembrecia menos cu un aña tambe por ta responsabel.
- G.A. (Gewijzigde Aansprakelijkheid) Responsabilidad Modifica: e responsabilidad di e miembronan ta limita y ta regla den e statuut.
- U.A. (Uitgesloten Aansprakelijkheid) Responsabilidad Exclui: e responsabilidad ta limita te e suma deposita.
- Capital di miembro: e suma total cu e miembronan a deposita como participacion den e asociacion. E deposito obligatorio aki ta conoci como deposito inicial. Eventualmente un asociacion por cobra un contribucion na su miembronan pa por haci gastonan necesario;
- Derecho y obligacionnan di e doñonan: e propiedad ta basa riba e socionan cohuntamente. E organo superior ta e Asemblea General (Algemene Ledenvergadering). Den e reunion di miembro ta nombra e directornan. E directiva ta consisti di 5 persona, incluyendo un presidente, un secretaria y un tesorero. E directiva ta representa e asociacion. E miembronan di e directiva por wordo retira door di e Asamblea General. Supervision riba e directiva ta necesario door di apunta un comisario.
- E Asociacion cooperativa por kibra door:
- Si e tempo a pasa;
- Si tin un decision di e asamblea general;
- Si bay failliet.
E disolucion mester wordo publica mediante e inscripcion den e registro comercial na Camara di Comercio.
Fundacion (Stichting)
- Persona huridico cu tin intencion pa logra un obhetivo decreta den e statuut. Un fundacion no tin miembro;
- Establecimento: ta bay mediante un acta di notaris, cu ta determina kendenan ta den e directiva y con nan por wordo reemplasa of via testament;
- Fundacion cu tin un meta comercial (mester di un permiso di negoshi);
- Un fundacion no tin supervision gubernamental;
- Registracion ta bay den un registracion central pa fundacion na Camara di Comercio.
