[email protected]

• ENG
• PAP

Bek pa tur topico

Lansa bo negoshi

• Scoge bo localidad di negoshi
• Scoge e structura di bo negoshi
• Scoge y registra e nomber di bo negoshi
• Haci bo negoshi legal
• Aplica pa licencia y permiso adicional
• Habri cuenta bancario
• Haya seguro di negoshi

Aplica pa licencia y permiso adicional

Depende di ki sorto di negoshi bo ta bay habri, bo lo tin mester un permiso adicional y lo mester aplica pa esaki na diferente departamento.Tene na cuenta cu algun permiso lo termina despues di un termino, pues tene na cuenta pa renoba esaki na tempo.

Contenido

• Permiso pa bende cuminda of bebida
• Informacion pa esnan cu ta trata cu cuminda (foodhandlers)
• Importacion di suplemento, remedi y productonan kimico pa uzo comercial
• Exigencia pa habri un botica
• Permiso pa bendedornan ambulante
• Permiso pa evento
• Permiso pa habri un cas di cuido
• Permiso pa watersport

---

Permiso pa bende cuminda of bebida

E permiso aki ta wordo otorga na Departamento di Legislacion y Asunto Huridico (Directie Wetgeving en Juridische Zaken/ DWJZ).

Vergunningsverordening (AB 2002 no. GT 1) y Vergunningsbesluit (AB 1990 no. GT 66) ta regula bendemento di cuminda y/of bebida por medio di diferente permisonan. E autoridad pa otorga, nenga y kita dicho permisonan ta cerca Minister di Salud Publico (Articulo 19 punto 1 Vergunningsverordening). E peticion pa dicho permisonan mester wordo haci na Departamento di Legislacion y Asunto Huridico (DJWZ).

Excepcionnan aki riba ta lo siguiente: pa Hotel- y logementvergunning ta ser otorga, nenga y kita door di Minister di Salud Publico den acuerdo cu Minister di Turismo (Articulo 19a punto 1a Vergunningsverordening).

All-inclusive vergunning ta ser otorga, nenga y kita exclusivamente door di Minister di Turismo (Articulo 19a punto 1b Vergunningsverordening).

Compara tipo di permiso pa restaurant, bar, cafe y nightclubs

Revisa e permisonan mas comun pa restaurant, bar, cafe y nightclubs

 

Permiso pa Restaurant A (Articulo 17 punto 1 Vergunningsverordening)
Dicho permiso ta otorga e derecho di benta, na escala chikito, di bebida no alcoholico, ijscream of producto similar y cuminda prepara den cushina situa na sitio di benta pa consumo na dicho lugar.

Permiso pa Restaurant B (Articulo 17 punto 2 Vergunningsverordening)
Dicho permiso ta otorga e derecho di benta, na escala chikito, di bebida no alcoholico, ijscream of producto similar y cierto cuminda cu facilmente por wordo prepara den e asina yama snelbuffet pa consumo na sitio di benta (no tin cushina).

Permiso pa Koffiehuis (Articulo 11 Vergunningsverordening)
Dicho permiso ta otorga e derecho di benta, na escala chikito, di bebida alcoholico sterki pa consumo na lugar di benta of otro lugar y tambe benta di bebida alcoholico zwak of bebida no alcoholico y ijscream of producto similar pa consumo na lugar di benta so.

Permiso pa Bierhuis (Articulo 15 Vergunningsverordening)
Dicho permiso ta otorga e derecho di benta, na escala chikito, di bebida alcoholico zwak (<21% volumen di alcohol), bebida no alcoholico, ijscream of producto similar pa consumo na sitio di benta.

Un koffiehuis- y bierhuisvergunning ta bin den combinacion cu un restaurantvergunning A of B. Esaki ta un maneho di Gobierno.

Permiso	Cushina	Bebida	Ijscream/ producto similar	Benta na
Restaurant A	Si	No alcoholico	Si	Escala chikito
Restaurant B	No (snelbuffet)	No alcoholico	Si	Escala chikito
Koffiehuis	Den combinacion cu Restaurant  Vergunning A of B	* Si alcoholico –sterki y zwak * No alcoholico	Si	Escala chikito
Bierhuis	Den combinacion cu Restaurant  Vergunning A of B	* Si alcoholico – zwak * No alcoholico	Si	Escala chikito

Revisa otro permisonan di Vergunningsverordening

 

Hotelvergunning (Articulo 10 inciso 1 y 2 Vergunningsverordening)
Dicho permiso ta otorga e derecho di mantene un hotel (acomodacion di 10 of mas persona). Tambe e derecho di benta, na escala chikito, di bebida alcoholico sterki y zwak, bebida no alcoholico, ijscream of producto similar y/of cuminda pa consumo na e sitio pa cual e permiso a ser otorga.

Logementvergunning (Articulo 16 Vergunningsverordening)

Dicho permiso ta otorga e derecho di mantene un acomodacion. Esaki ta por ehemplo, apartamentonan of cama y desayuno (pa un maximo di 9 y no menos cu 4 persona). Tambe e derecho di benta, na escala chikito, di bebida alcoholico zwak, bebida no alcoholico, ijscream of producto similar y cuminda pa consumo door di solamente bishitantenan y nan famianan na e sitio di acomodacion.

All-inclusive vergunning (Articulo 10 inciso 3 Vergunningsverordening)

Dicho permiso ta otorga e derecho pa huurmento di acomodacion cu tur cos inclui te cu e cantidad indica den e permiso. (Mester tin un hotel- of un logementvergunning den bo poder pa por bin na remarca pa un all-inclusive vergunning desde 1 juli 2018). All-inclusive vergunning ta ser otorga, nenga y kita exclusivamente door di Minister di Turismo (Articulo 19a punto 1b Vergunnings-verordening).

Sociëteitvergunning (Articulo 12 Vergunningsverordening)

Dicho permiso ta otorga e derecho di benta, na escala chikito, di bebida alcoholico sterki y zwak, bebida no alcoholico, ijscream of producto similar y/of cuminda na solamente miembronan di e sociedad y nan introducidonan pa consumo na e lugar pa cual e permiso ta valido. (Por pensa riba permiso pa un asociacion manera fundacion, polis, aduana, por ehempel antes Tivoli y Club Caribe).

Grossiervergunning (Articulo 13 Vergunningsverordening)

Dicho permiso ta otorga e derecho di benta, na escala grandi di bebida alcoholico sterki pa consumo na solamente otro lugar pa cual e permiso ta valido. Pues e alcohol sterki mester ta den boter cera di mas cu 9 liter (Groothandel).

Slijtvergunning (Articulo 14 Vergunningsverordening)

Dicho permiso ta otorga e derecho di benta, na escala chikito di bebida alcoholico sterki y zwak pa consumo na solamente otro lugar pa cual e permiso ta valido. Por pensa aki benta den un supermercado (slijterij) of un rumshop. E permiso aki no ta wordo duna mas pa rumshop. E luga unda e bebidanan ta poni (afzetruimte) den un supermercado mester ta 6 meter cuadra y mag di keda habri te 6:30 pm (pa ley). Despues di e ora aki e afzetruimte aki mester ta cera y na lock.

IJshuisvergunning (Articulo 18 Vergunningsverordening)

Dicho permiso ta otorga e derecho di benta, na escala chikito, di bebida no alcoholico, ijscream of producto similar pa consumo na sitio di benta.

Restaurant, bar, café y night clubs (discoteca), mester aplica pa permisonan di Restaurant-, Koffiehuis- y Bierhuisvergunning.

Buffetvergunning (Articulo 46 Vergunningsverordening)

Un buffetvergunning ta necesario pa por tin cuminda y bebida na benta legalmente durante un evento deportivo, caricativo of social cu ta wordo organisa un of mas biaha. Den e caso aki por pensa, por ehempel, riba benta di cuminda y bebida durante di un concierto cu lo tuma lugar durante cierto oranan di un of mas dia.

Un buffetvergunning ta un permiso temporario cu ta wordo otorga door di Minister di Salud Publico conforme Articulo 46 di e ‘Vergunningsverordening’.

Den caso cu ta trata di un evento comercial, Director di Departamento di Legislacion y Asunto Huridico (DWJZ) por, a base di mandato di Minister di Salud Publico, otorga e permiso aki den su nomber. E aplicacion pa e permiso menciona por wordo haci por medio di un formulario cu DWJZ tin disponibel.

Dispensacion pa Horeca

E siguiente dispensacion (ontheffing) por ser otorga a base di ‘Vergunningsverordening’ pa Horeca pa e siguiente actividadnan den e establecimento of localidad:

• Musica mecanico (p.e. dj of jukebox) of musica live (p.e. banda musical) den e establecimento of localidad (Articulo 52 Vergunningsverordening);
• Bailamento (Articulo 52 Vergunningsverordening);
• Mashin di refresco y/of snacks (Articulo 45 Vergunningsverordening);
• Ceramento mas laat cu orarionan stipula den Articulo 47 punto 1 te cu 3 Vergunningsverordening  (a base di Articulo 47 punto 4 Vergunningsverordening e maneho nobo di Gobierno elabora den e ‘Beleid Sluitingstijden per 1 november 2016 horecagelegenheden’ ta stipula 01:00 am den siman y 03:00 am diabierna y diasabra of riba dianan di fiesta cu excepcion di centro di Playa pa cual e orarionan 02:00 am y 04:00 am ta respectivamente aplicabel).
• Uzo di personal bou di 18 aña (Articulo 53 Vergunningsverordening).

Pa por haci peticion pa un of mas di e dispensacionan menciona mester acudi na Departamento di Legislacion y Asunto Huridico (DWJZ).

Loke mester wordo haci prome cu pidi un permiso pa bende cuminda of bebida

• Prome cu huur of cumpra un establecimento, mester verifica cu e doño si e destinacion di e establecimento ta pa habri un di e negoshinan ariba menciona y check ki tipo di tereno e tin (Articulo 7 y 24 Bouw- en woningverordening);
• Mester verifica si e edificio tin bouwvergunning, un bouwtekening aproba y si tin renobacion/cambio parcial a wordo haci na e establecimento cu DOW no a keur. Si esaki ta e caso, DOW lo duna un conseho negativo pa cu un peticion pa permiso di renobacion parcial (Articulo 7, 16, 17 y 22 Bouw- en woningverordening);
• E negoshi mester ta inscribi na Camara di Comercio (Articulo 1 Handelsregisterverordening);
• Mester aplica pa un permiso di establecimento na Departamento di Asunto Economico, Comercio y Industria (Articulo 2 Vestigingsverordening bedrijven);
• Tur esnan cu ta bay ta den contacto cu cuminda of bebida mester aplica pa un Certificado di Salud (ex-carchi Berde) na Departamento di Salud Publico (Directie Volksgezondheid) (Articulo 4 jo. 1 Personeelsbesluit warenverordening bedrijven).

Hindervergunning (Articulo 1 Hinderverordening jo. Articulo 1 Hinderbesluit)

Den caso cu e establecimento ta uno cu por ocasiona mal holo, huma of vapornan, door di desordo of door di un otro manera lo por ocasiona molestia, daño of peliger na e medio ambiente, mester aplica pa un ‘Hindervergunning’. E Hinderbesluit ta menciona e establecimentonan pa cual e permiso aki ta necesario pa por wordo estableci.

Un ‘Hindervergunning’ ta wordo otorga door di Minister di Husticia conforme e Hinderverordening (AB 1988, no. GT 27) y Hinderbesluit (AB 1995, no. GT 20). Tambe pa e Hindervergunning por aplica por medio di un formulario cu Departamento di Legislacion y Asunto Huridico (DWJZ) tin disponibel.

Entrega di peticion

Hunto cu e peticion (formulario, no carta) pa e permiso mester entrega e siguiente documentonan, si ta aplicabel, na DWJZ:

• Un prueba di inscripcion di Censo (no mas cu 3 luna bieu);
• Un declaracion di buena conducta di Ministerio Publico (no mas cu 3 luna bieu);
• Un copia di e mapa di e establecimento riba schaal 1:100 cu tur midi riba dje;
• Un copia di e bouwvergunning;
• Tres (3) copia di e bouwvergunning, pues e mapa cu stempel di DOW;
• Si ta aplicabel: un copia di e ‘Hindervergunning’ (asina cu tin boter di gas den e establecimento mester aplica pa un hindervergunning);
• Un vestigingsvergunning ora cu ta trata un entidad huridico (rechtspersoon);
• Un copia di verklaring di Kadaster;
• Un copia di acto di erfpacht;
• Si e localidad ta riba un tereno erfpacht of huurgrond: un prueba di e destinacion;
• Un copia di e huurcontract of prueba cu ta doño di establecimento (acta notarial);
• Si e peticion ta pa un ‘Sociëteitvergunning’: un lista di e miembronan mencionando nan nomber y adres, un copia di e reglamentonan y un copia di statutonan;
• Si e peticion ta bin di un rechtspersoon (entidad huridico p.e. un NV, VBA, Fundacion of Asociacion) un prueba di inscripcion di Camara di Comercio y un prueba di bon Conducta di tur miembro di directiva no mas cu 3 luna bieu;
• Un copia di sea rijbewijs, paspoort of cedula valido di e aplicante of di e miembro di directiva.

Por tuma contacto cu Directie Wetgeving Juridische Zaken (DJWZ)

Pa mas informacion tocante e permisonan menciona y pa busca e formulario di peticion pa permiso por tuma contacto cu:

---

Informacion pa esnan cu ta trata cu cuminda (foodhandlers)

E Departamento di Alimento y Higiena di Departamento di Salud Publico (DVG) ta encarga cu keurmento di tur personal cu ta traha cu cuminda y/of bebida.

Keurmento

Tur aña e persona cu ta traha cu cuminda y/of bebida mester presenta na oficina di Departamento di Alimento y Higiena pa haci un test di sushi (ontlasting) y saca un potret di pulmon (cu tin un validez di 5 aña).

A base di resultado di e testnan, ta determina si e persona ta bin na remarke pa un Certificado di Salud (ex-Carchi Berde), pa e por cuminsa of sigui traha pasobra e ta liber di Salmonella, Shigella, Campylobacter of Tuberculosis.

Si un di e testnan aki sali malo, e persona no mag di traha. E persona tin cu bay su dokter di cas of specialista cu ta trate.

E enfermeronan di Servicio di Malesanan Contagioso lo haci un control di e famia of di esnan cu tin contacto directo cu e persona aki. E persona mester haya tratamento di su dokter.

Despues di tratamento mester ripiti e testnan. Si e testnan sali bon e persona mester presenta, cu un copia di e resultado na seccion di ‘Foodhandlers’ pa e por haya su Certificado di Salud. Ta asina so e por reanuda su trabou.

Salmonella, Shigella, Campylobacter

E malesa aki ta wordo transmiti comiendo cuminda contamina cu e bacteria. Un ehempel ta ora un persona infecta bay af y no laba su mannan bon y na su turno ta traha cu cuminda of coy bebe pa otro persona. Sintomanan ta entre otro: diarea, sacamento y dolor of molester di stoma.

Tuberculosis

E malesa aki ta wordo transmiti door di tosamento. Esaki ta pasa solamente na momento cu e persona infecta cu e bacteria di Tuberculosis, ta malo y e tin slijm den su pulmon. Sintomanan ta entre otro: tosamento cu slijm of slijm cu sanger, sodamento anochi y perdemento di peso sin ningun motibo.

Rekisito pa por haya un Certificado di Salud (ex-Carchi Berde)

• Solamente online por haci cita na www.dvg.aw
• E Certificado di Salud ta valido pa 1 aña
• ID valido cu ta un Cedula of Rijbewijs conhuntamente cu un papel di 5 florin di Censo of un Paspoort conhuntamente cu un papel di 5 florin di Censo.
• Mester paga Afl. 30,- na Departamento di Salud Publico Aruba (DVG); por paga solamente online of swipe.
• No mester trece potret, e persona mester presenta personalmente.
• Test di laboratorio tin costo di Afl. 40,- cual mester wordo paga na laboratorio mes.
• Cada 5 aña un persona mester haci un test di Thorax.
• E dia cu a entrega e sushi (ontlasting) na laboratorio, despues di 10 dia di trabou, e persona mester presenta personalmente pa busca e Certificado di Salud.
• Solamente riba diabierna ta otorga Certificado di Salud.
• E Certificado di Salud mester ta den e luga di trabou y un caminda cu e ta visibel.

Por tuma contacto cu Directie Volksgezondheid (DVG)

---

Importacion di suplemento, remedi y productonan kimico pa uzo comercial

Importacion di suplemento pa uzo comercial

Pa importa un suplemento pa uzo comercial mester entrega algun documento na Inspeccion di Salud Aruba (IVA), seccion Medicina.

Tur suplemento cu ta wordo bendi pa bestia den pet shop, suplementonan cu ta wordo bendi den sex shops y den vitamin shops tambe mester pasa den e mesun proceso cu ta wordo describi aki riba.

E documentonan ta lo siguiente:

• Un peticion por escrito pa evaluacion, cu e nomber y marca di e suplemento y e ingredientenan di e suplemento;
• Informacion farmaceutico di e suplemento cu informacion di e dosis;
• Un muestra (sample) di e paki original manera cu e ta wordo presenta den e tienda y tambe e artwork di e producto cu e lo kier trece riba mercado;
• Den un map: e label geplak riba un papel A-4 blanco, eventualmente paki di e suplemento y tambe descripcion di e suplemento cu ta bin den e paki;
• Un prueba cu e suplemento ta bou control di autoridadnan cualifica di e luga di unda e suplemento ta bin (‘Certificate of Free Sale’);
• Un Certificado di Analisis original (‘Certificate of Analysis’). Pues, e composicion cuantitativo y cualitativo di e producto;
• Un Certificado di Salud original. Pues, e ‘Health Certificate’ di e keuringsdienst di emercancia.

Si e solicitante ta entregando e peticion pa prome biaha, e mester entrega e siguiente documentonan adicional;

• Un copia di registro di Camara di Comercio di e negoshi;
• Un papel di 5 florin di Censo di e director di e NV of e doño;
• Un copia di un ID valido (paspoort, rijbewijs, cedula).

Si e solicitante ta un persona cu no ta naci na Aruba, e mester entrega e siguiente documentonan adicional:

• E documento original di e permiso di trabou y residencia;
• Un copia di registro na Camara di Comercio di e negoshi;
• Un papel di 5 florin di Censo di e director di e NV of e doño;
• Copia di paspoort valido di e solicitante.

Tin remedi cu por wordo bendi:
VV       ‘Vrije Verkoop’: esaki por wordo bendi sin receta di dokter
UA       ‘Uitsluitend Apotheek’: solamente na un botica
UR       ‘Uitsluitend Recept’: solamente via receta di dokter

Pa importa un remedi, e solicitante mester entrega un peticion via Bureau Interne Diensten (BID) pa despues e peticion wordo manda pa e bureau di Minister di Salud Publico. E peticion lo wordo manda pa Inspeccion di Salud Aruba (IVA) pa conseho. E solicitante mester entrega e documento menciona aki riba pa asina por traha riba un conseho pa e Minister concerni y e permiso lo wordo traha door di DWJZ.

Despues di ricibi un permiso pa por importa remedi, e remedi cu e solicitante ta desea di importa mester wordo evalua y registra door di un comision pa asina e remedi por wordo permiti den e registro di remedinan. E registracion di e remedi ta wordo haci na Departamento di Salud Publico (DVG). E solicitante mester paga un suma di Afl. 500,- pa cada remedi cu e kier registra. E registracion di un remedi ta valido pa 5 aña. Pa registra un remedi di nobo, e solicitante mester paga un suma di Afl. 250,-.

Importacion di productonan kimico pa uzo comercial

Pa importa productonan kimico pa uzo comercial mester entrega un peticion 6 luna adelanta y tambe un ‘Material Safety Data Sheet’ (MSDS), cual ta disponibel pa e fabricante di e producto of kimico na Inspeccion di Salud Aruba (IVA). E sheet aki ta describi e contenido di e producto. Si e peticion wordo entrega cu tur documento rekeri, e proceso pa haya permiso pa importa un producto kimico por tarda 1 pa 2 siman pa keda cla. Pa cada producto kimico mester entrega un peticion individual.

Aceton

Den caso di importacion di aceton, Cuerpo Policial Aruba (KPA) lo haci un investigacion. Lo busca informacion via Interpol pa screen e interesadonan y e negoshi. Tambe, e luga di establecimento mester ta adecua pa procesa y warda e productonan. Despues, KPA lo manda un rapport di e resultado di e investigacion pa Procurador-General. E proceso aki lo dura por lo menos 6 luna.

Por tuma contacto cu Inspectie Volksgezondheid Aruba (IVA)

---

Exigencia pa habri un botica

Pa habri un botica mester cumpli cu e siguiente rekisitonan:

• Mester tin un contracto cu  AZV;
• Mester tin minimo 1 apotheker y minimo 3 apothekers assistenten;
• E apotheker por tin diploma di Hulanda, Europa of Merca y e apothekers assistent por tin diploma di Aruba. E diploma di Merca mester ta ekivalente na esun di Hulanda. Esaki lo wordo aproba door di un comision cu ta consisti di 3 apotheker. Cu e introduccion di AruBig, e diploma lo wordo aproba na Departamento di Salud Publico (DVG);
• Mester entrega mapa di e plattegrond;
• E luga di establecimento lo wordo inspecciona varios biaha: fisicamente y tambe via documentonan;
• E peticion mester wordo dirigi na Minister di Salud Publico y entrega via Bureau Interne Diensten (BID) situa na Wayaca. E peticion lo wordo manda pa Inspeccion di Salud Publico (IVA);
• IVA lo duna aprobacion si ta cumpli cu e exigencianan pa habri un botica.

‘Landsverordeningen’ cu ta trata e informacion tocante importacion di remedi, habrimento di un botica y pa importa kimico:

• Landsverordeningen op de Geneesmiddelenvoorziening (AB 1990 GT9)
• Landsbesluit Inrichting Apotheken (AB 1989 GT86)
• Landsverordening Bestrijdingsmiddelen (AB 1991 GT 69)

Por tuma contacto cu Inspectie Volksgezondheid Aruba (IVA)

---

Permiso pa bendedornan ambulante

‘Ventvergunning’ ta trata di bendedornan ambulante cu ta bende riba of banda di caminda publico.

Tipo di ventvergunning:

1. Ventvergunning como un profesion (bo no mag di tin otro entrada)

• Permiso ta valido pa 1 aña;
• Mester aprobacion di Minister pa sitio/tereno;
• Limite di 2 lugar;
• Aplicacion: Minister di Asunto General, cu despues ta mande pa KPA pa conseho.

2. Ventvergunning pa un temporada of un evento (eenmalig)

• Carnaval, benta di t-shirts den periodo di 18 di maart, Mundial, etc.
• 1 dia: benta di rosa canto di caminda riba Valentine’s Day, etc.
• Aplicacion: KPA

Rekisitonan pa un ‘Ventvergunning’

• Carta di peticion dirigi pa Ministerio di Asunto General;
• Polis di Bario lo trata e peticion aki;
• Papel di 5 florin di Censo;
• Copia di ID of paspoort;
• Stampia di Afl. 4,- (por cumpra esaki na postkantoor);
• Prueba di Certificado di Salud (Gezondheidsverklaring di DVG);
• Declaracion di bon conducta;
• Prueba di pago precariokosten di e venten (DIP);
• Potret di truck of kiosco. E vehiculo/stand mester ta movibel, e no mag di keda para riba parcela ora cu no ta den funcion, pues e no mag di ta fiho na sitio;
• DTI tin cu keur e y bombero pa seguridad di candela;
• Extracto di KvK;
• Mapa di situacion di tereno;
• Si ta erfpacht mester tin permiso di DIP;
• Si ta trata tereno eigendom mester tin permiso (carta) di e doño.

Costo envolvi

• Afl. 507,50 pa aña
• Pago na KPA ta bay solamente cu swipe of por paga tambe via Arubabank, pero aki bo mester tin un comprobante di pago.
• Mester renoba permiso tur aña. Tin cu entrega aplicacion tres (3) luna prome cu esun vigente caduca.
• Ventvergunning como profesion (tipo 1) tin cu move di un lugar pa e otro. Ta permiti pa para 2 pa maximo 3 ora na cada lugar di benta.
• Aplicacion tin cu wordo entrega na e warda di polis den e bario unda ta bay vent. Si ta trata di mas cu 1 bario, conseho lo wordo duna door di e polisnan di e otro bario.

---

Permiso pa evento

Pa tur tipo di evento riba caminda of tereno publico, manera concierto, caminata, fiesta publico, actividadnan deportivo, camping, beach wedding, etc.

• Aplicacion na KPA;
• Formulario di aplicacion obtenibel na KPA;
• Copia di ID di aplicante;
• Stampia di Afl. 4,- (obtenibel na postkantoor);
• Peticion ta 12 dia di trabao prome cu fecha di evento;
• Costo ta varia pa tipo di evento, cual mester wordo paga door di e organisador;
• Tin costo adicional pa baño publico, tent, stoel, mesa, delco, etc.

Despues di entrega tur documento completo e proceso lo start. Bo persona lo wordo yama pa busca e decision pa e permiso manera esaki keda cla. Cu e decision aki bo lo mester pasa na e Warda di Polis concerni pa haya bo permiso

---

Permiso pa habri un Cas di Cuido

Cas di Cuido: Cas di Cuido na 4 of mas persona; ta ricibi y ofrece cuido, guia, tratamento of enfermeria.

E permiso aki ta wordo otorga door di Minister encarga cu Salud Publico:

• Pa medio di un formulario di peticion fiho, obtenibel na DVG, seccion Dienst Ouderenzorg (DOZ);
• Papel di 5 florin di Censo;
• Copia di e statuutnan;
• Riba un scala di 1:100, pintura y descripcion di ubicacion y diseño di e parcela (pintura di cada espacio y pakico e ta wordo uza);
• Copia di seguro di candela y responsabilidad civil;
• Plan di maneho (trabaonan y cada 4 aña mester wordo ahusta (Art.14, lid 1);

E peticion lo wordo manda door di DVG, seccion DOZ pa lo siguiente:

• Declaracion di seguridad di candela (sigura suficientemente)/Brandweer;
• Declaracion di higiena di e parcela/ DVG unit, Dienst Warenkeuring en Hygiene (DWKH) (esaki ta e departamento cu ta zorg pa carchi di salud);
• Declaracion di inspeccion di coriente, gas y seguridad di un parcela (cas di cuido)/ Dienst Technische Inspecties (DTI).

Pa cada trahado mester entrega:

• Un declaracion di Buena Conducta (Ministerio Publico) (< 2 luna);
• Un declaracion di Salud (Gezondheidsverklaring) (Departamento di Salud Publico) (< 1 luna) pa tur esnan cu ta encarga cu cuminda;
• Un extracto di Registro Censo (< 3 luna);
• Copia di un identificacion valido.

Por tuma contacto cu Directie Volksgzondheid (DVG)

---

Permiso pa watersport

Directie Scheepvaart Aruba (DSA) / (Administracion Maritimo di Aruba) ta otorga e permiso aki. Documentonan cu mester entrega na momento cu haci un peticion pa un permiso a base di ‘Articulo 18 LOWS watersportvergunning’:

• Peticion mester ta seya den un carta cu stampia di Afl. 4,-;
• Den e peticion mester menciona specificamente e actividad y e lugar caminda e actividad ta bay tuma lugar, como tambe si ta desea un localidad, mester menciona e sitio unda ta desea esaki. Pa standplaats, esaki lo bay DIP pa conseho;
• E ‘inlichtingenformulier’ yena completo y di acuerdo cu e berdad (disponibel na DSA);
• Copia di registro di Camara di Comercio;
• Copia di un identificacion valido di e representante legal;
• Copia di e registracion di e boto/seadoo/jetski, etc;
• Copia di e permiso di nabegacion.

Despues di aprobacion di minister encarca cu Transporte Publico, prome cu entrega e permiso: Copia di seguronan di responsabilidad conforme Articulo 19 LOWS; (aansprakelijkheids-verzekering aan derden): ta encera entre otro pa daño di negoshi y pa pasahero. E seguro aki ta wordo cera na un compania di seguro.

Por tuma contacto cu Directie Scheepvaart Aruba (DSA)

Scroll To Top

© 2024 Idea: Iniciativa pa Desaroyo di Empresa Arubano | Disclaimer

By orbitalnets