Cera of bende bo negoshi

Crea un plan completo pa transferi e propiedad, ora di bende of cera bo negoshi. Busca consehonan pa sa ki decision bo mester tuma na final.

Contenido


Cera bo negoshi

Cera bo negoshi ta un escogencia hopi dificil pa haci. Pa decisionnan asina ta bon pa busca conseho di un abogado y otro profesionalnan incluyendo accountant y business consultant.

Sigui e siguiente pasonan pa cera bo negoshi.

  1. Dicidi pa cera. Un eenmanszaak por dicidi riba su mes pa cera, pero tur tipo di partnership ta rekeri cu e co-propietarionan mester ta di acuerdo.
  2. Presenta documentonan di disolucion. Si bo no disolve bo registracion di negoshi legalmente, bo lo mester sigui paga belasting.
  3. Cancela bo registracion, permisonan, licencianan y bo nomber comercial. Proteha bo finansas y reputacion cancelando cualkier di esakinan cu bo no ta bay tin mester mas, incluyendo bo nomber comercial.
  4. Cumpli cu compromisonan cu tin di haber cu empleo y e ley laboral.
  5. Resolve obligacionnan financiero, manera paga tur impuestonan (BBO/BAZV, AWW/AOW, Loonbelasting, Inkomstenbelasting, Winstbelasting etc).
  6. Mantene y warda tur bo registronan y documentonan importante pa por lo menos 10 aña, por ehempel di impuesto y empleado.

Bende bo negoshi

Despues di considera cu hopi cuidao, bo por dicidi pa bende bo negoshi. Un bon planificacion por yuda bo garantisa cu bo ta cubri tur bo basenan.

Duna bo negoshi un balor monetario, prome cu bo negocia cu posibel cumpradonan. Evalua esaki hunto cu un profesional (taxateur).

Balora cu precision (nauwkeurig) tur e propiedadnan y real estatenan cu ta mara (gekoppeld) na bo negoshi. Esakinan por ta, bo marca, propiedad intelectual, informacion di cliente y proyeccion di entradanan den futuro.

Ora cu bo ta averigua cuanto bo negoshi ta bal, considera e metodonan di balor comun aki:

  1. Enfoke di entrada. Analisa e entradanan proyecta y tene na cuenta e riesgonan potencial.
  2. Enfoke di mercado. Compara bo negoshi cu otro negoshinan similar cu esun di bo cu ya a wordo bendi.
  3. Enfoke di activa. Kita (trek af) e total di e obligacion comercial (passiva) for di e total di e balor di tur e activanan.

Haci un acuerdo di benta

Bo mester prepara un acuerdo di benta pa por bende bo negoshi oficialmente. E documento aki ta permiti e compra di bo pertenencianan (activa), accionnan (stock) di un corporacion. Un abogado mester revise pa wak si e ta exacto y completo.

Numera tur e inventario di benta hunto cu e nombernan di e bendedo, cumprado y e empresa. Yena background details. Determina con e negoshi lo wordo ehecuta prome cu e cera y e nivel di acceso cu e cumprado lo tin den e informacion. Scirbi tur ahustacion, e tarifanan di e broker y otro aspectonan relevante den e termino di acuerdo.

No laga afo ningun activa of passiva, ya cu esaki por crea problema incluso despues cu bo ya a finalisa e benta.


Transferi bo propiedad

Hopi doñonan di negoshinan chikito lo haya situacion unda nan lo mester transferi nan propiedad (ownership) pa un otro persona of entidad. Bo lo tin un paar di diferente opcionnan disponibel pa haci esaki.

Opcion Scenario Beneficio
Benta di biaha Sara tin un tienda di bende sapato cu no ta bayendo bon, y a dicidi di bende esaki, pasobra e kier sali di dje y mester di placa. Door di bende e tienda Sara a transferi propiedad y a haya placa mes ora.
Benta gradual Johnny ta doño di un mercado, pero a dicidi cu e no ta bay haci s di su luga pa e mes sigui bende. Johnny ta hayando su entrada di e personanan cu ta huur for di dje, pesey e no mester worry. E opcion aki ta beneficia un persona cu no ta logra pa bende su negoshi di biaha, pero cu si por financia un plan di pago cu tin termino largo. Un benta gradual ta un opcion flexibel pa transferi un negoshi.
Contrato di Huur (Lease) Johnny cu ta doño di un carrental a dicidi di bay Hulanda pa 2 aña pa haci un estudio. E a dicidi di transferi su propiedad durante e 2 añanan aki cu su primo via di un contrato di huur (lease). Door di transferi su negoshi pa un di huur (lease), e lo pone den un contract tur detayes tocante condicionnan y pago cu e lo ricibi durante e temporada di su ausencia.

Declara bancarota ‘Suspension di Pago’

Esnan cu ta declara bancarota pa un persona huridico of un persona no huridico ta su cobradonan, pero e mesun persona huridico of persona no huridico tambe por declara su mes bancarota. Esaki ta sosode den un situacion den cual e debedor no por paga su cobradonan mas.
Pa por declara bancarota y pa esaki por wordo concedi, ta importante cu tin promocion di sosten. Esaki ta reclamo di pago cu otro cobradornan tin contra e debedor cu a wordo declara bancarota.
Na e momento cu hues dicta e bancarota, e debedor ta perde e disposicion riba su bienes. E hues cu ta dicta bancarota lo nombra un curator cu lo traha riba e caso y lo tene cuenta lo mas miho posibel cu e interes di e cobradonan. E curator ta en principio un abogado y ta responsabilisa su mes na e hues te na final di e bancarota.
Tambe un compania por pidi un “Suspension di Pago”. Esaki kiermen cu bo ta aplasa bo pago pa bo compania por sobrevivi. Pa un “Suspension di Pago” mester tin problemanan financiero cu ta temporal y por wordo soluciona riba termino corto. Durante un “Suspension di Pago” ta instala un gobernante cu hunto cu e debedor lo dispone hunto riba e maneho di e compania. E debedor lo mester e sosten di e gobernante ora di tuma decisionnan importante.

Scroll To Top