Bek pa tur topico

Kidpreneurship

August 18, 2021

Den aña 2018, IDEA a inicia cu un proyecto special pa muchanan entre e edadnan di 9 pa 13 aña yama, Kidspreneur$ with BIG Ideas.
E proyecto aki a tuma luga na e 9 traimerdianan di gobierno situa na: Dakota, Morgenster, Sabana Basora, Oranjestad, Santa Cruz, Noord, Kudawacha, Paradera y San Nicolas.
E projecto aki a wordo presenta 2 biaha pa siman, durante 6 siman na cada traimerdia, entre e orario di 3:30 pa 4:30 pm.
Profesionalnan den diferente tarea a presenta un workshop na e muchanan. Algun di e workshopnan tabata: traha carchi creativo, pintamento riba canvas y boter, trahamento di juice saludabel, enseñansa di creacion areglo musical, traha nan mes un business plan, trahamento di tuna wrap y mucho mas.

E meta di e proyecto aki tabata: pa ofrece e muchanan educacion empresarial locual lo yudanan reconoce oportunidadnan comercial. E muchanan a siña durante e proyecto aki, con pa gana placa ya for di un edad hopi jong usando nan mesun creatividad.

Durante e vakantie di scol den oktober (2018 y 2019) IDEA a sigi cu mas proyecto pa muchanan cu no ta atende traimerdia y e proyecto aki a wordo yama Kid$ BIZ Market.

Na final di añanan 2018 y 2019, IDEA a organisa un Kidpreneur$ Bazaar den Caya Grandi, caminda tur e muchanan cu a participa den e proyectonan aki di IDEA a bin hunto, pa bende tur nan productonan cu nan a logra traha durante e proyectonan aki.

E proyectonan aki pa nos muchanan tabata un exitoso, caminda un total di 290 mucha a logra di ricibi un certificado na clausura di e proyecto na su localidad.

E proyecto aki sigur lo continua den e proximo añanan.

Scroll To Top