Meta di campaña Cumpra Local

E unidad IDEA conhuntamente cu ex Minister di Economia a lansa e campaña Cumpra Local den Caya Grandi dia 25 november 2021. E meta di e campaña ‘Cumpra Local’ ta pa conscientisa nos comunidad e importancia di cumpra productonan local y haci uso di nos servicionan di nos negoshinan local pa yuda reconstrui nos economia.

Logo di Cumpra Local

E logo di e campaña Cumpra Local tin tres figura cu tin dos significacion:

• e prome significacion ta e hende cu ta nos fortalesa. Pa medio di e campaña aki, nos hendenan y henter comunidad lo bai beneficia di dje.
• E di dos significacion ta cu e figura ta simbolisa nos negoshinan, negoshi micro, chikito y mediano. E figuranan ta conecta cu otro cual ta tipifica e compromiso cu cada cuidadano y comerciante tin cu Pais Aruba. E fluho ta simbolisa e placa cu ta keda circula den nos economia pa crea un economia sostenibel pa nos Pais.

E logo ta consisti di cuater color cual ta oraño, geel blauw y shinishi:

• e color oraño ta nifica e determinacion di nos comerciantenan pa logra exito;
• e color geel ta nifica optimismo y positivismo, e pensamento positivo y actitud optimista di nos comerciantenan pa bay dilanti;
• e color blauw ta simbolisa e confiansa di nos hendenan y e stabilidad di e negoshi;
• e color shinishi ta nifica e compromiso di nos pueblo cu e comercio di nos Pais.

Campaña Cumpra Local

E campaña Cumpra Local lo concrenta su publicidad riba medianan social, den corant, na radio y via television.

Nos yiu di tera internacionalmente conoci Jeon, a traha un jingle y videoclip cu e mensahe di ‘Cumpra Local’ cu lo bay ta na varios radio, television y tambe riba e paginanan di facebook ariba menciona. Lo sigi duna varios entrevista na radio y television pa duna mas informacion tocante di e campaña Cumpra Local. E campaña ta consisti tambe di entrevista educativo cu ehecutivonan di departamentonan di SVB, DIMP y DEZHI pa comparti informacionan importante tocante operacion di un negoshi. Hunto cu esaki lo tin entrevista cu varios entrepreneurs cu lo duna informacion tocante di e producto y/of servicio cu nan ta ofrece y tambe nan ta splica kico nan a haci y ta hacienda pa por sobrevivi e temponan dificil aki y ofrece nan oferta na comunidad. Pa e comerciantenan cu kier participa na e campaña por tuma contacto cu sra. Louella Croes na telefon, 521 2400/521 2439 of por manda un email na [email protected]. Importante ta pa e negoshi ta legalmente inscribi y tin su papelnan na ordo pa por participa.

#DiNosPaNosMes

IDEA ta haci un apelacion na cada cuidadano cu ora bo cumpra un producto of haci uso di un servicio local, por saca un potret y post e riba bo pagina di facebook cu #cumpra local of #dinospanosmes pa asina yuda promove e campaña Cumpra Local. Ban uni forsa pa asina hunto nos por crea y sostene empleo y nos comercio. Asina nos por crea un desaroyo di un economia sostenibel pa Pais Aruba y alabes nos por yuda stimula entrepreneurship pa e futuro generacion.